La prevendita entscheiva!

La prevendita entscheiva!

Entschatta dalla vendita da bigliets per «La stria da Dentervals»

Dapi ch’igl ei vegniu enconuschent ch’ei dat in teater el liber a Mustér vegn adina puspei dumandau il comite d’organisaziun nua e cura ch’ins sa cumprar bigliets per las presentaziuns. Ussa eis ei finalmein aschi lunsch e la prevendita entscheiva.

In onn ei l’uniun «Dentervals» gia vid organisar il teater el liber «La stria da Dentervals» screts da Hubert Giger ed inscenaus da René Schnoz. La premiera ei ils 30 da matg 2019 a Mustér a Sontga Gada. «Ei fa grond plascher da finalmein astgar lantschar la prevendita» di il president dil commité d’organisaziun Gion Hosang. «Quei ei in ulteriur impurtont pass viers las producziuns» di el vinavon.  Per las 10 producziuns sattan mintgamai 270 plazs a disposiziuns. La tribuna d’aspectaturs ei cuvretga aschia ch’ei sa vegnir giugau da prest tutta aura. Anulau ina producziun vegn mo el cass che la sgirtad ei buca garantida per aspectaturas ed ascpectaturs e participontas e participonts. Ils datums ed ils temps d’untgida vegnan communicai el mument che la producziun sa buca vegnir dada.

Categorias e prezis

Ei dat duas categorias da plazs. Ell’emprema categoria cuostan ils bigliets 55 francs ed ella secunda categoria 39 francs. Ils plazs san vegnir reservai online sin nossa pagina d’internet www.dentervals.gr. Il pagament succeda via carta da credit ni cun cedel da pagament. Per tut quellas e quels che han buca internet dat ei la pusseivladad da reservar e cumprar ils bigliets ella Papetaria Libraria Andrea a Mustér.

Cun brunch e tscheina

La bellezia atmosfera ch’il liug da Sontga Gada porscha allas producziuns gida segir da saver seprofundar el tema dalla persecuziun dallas strias. Quei sa aunc vegnir augmentau ordavon cun in brunch ni cun ina tscheina che va a prau cul temps dil 17avel e 18avel tschentaner. Ton pil brunch sco per la tscheina vegn preparau differentas tratgas che san vegnir elegidas vid in buffet tenor agen gust. Per porscher ils solvers e las tscheinas dat ei sper il liug da producziun a Sontga Gada ina gronda tenda scaldada. Brunch dat ei naven dallas 9.30, tscheina naven dallas 18.00.

Leave a Reply

Your email address will not be published.