Christina Bundi

Home / Christina Bundi

Christina Bundi

Assistenta reschia / actuara

Christina Bundi-Cabalzar ei naschida 1960 a Glion ed ei carschida si a Riein cun quater
soras pli giuvnas sin in bein puril. Cun 18 onns eis ella ida a Mustér per luvrar en in hotel.
Leu ha ella era empriu d’enconuscher la cultura da tscheiver e fatg las empremas
experientschas cun seschluitar en differentas rollas, quei che ha fascinau ella. Aschia ha
ella decidiu da far in emprova en la gruppa da teater. L’emprema rolla da teater ch’ella –
che discuora aschi bugen – ha giu, ei stau ina rolla da statista senza text 1991. In onn pli
tard eis ella daventada commembra dalla Gruppa da teater Mustér.

Suenter ch’ella ha maridau Corsin Bundi 1988 e suenter la naschientscha da Bianca 1993
e Serafin 1995 ha ella adina puspei giugau teater ella gruppa da teater. 2012 ha ella fatg a
Herisau il cuors da reschia. Dapi lu fa ella alternont reschia e gioga ina rolla ella Gruppa
da teater Mustér. 2015 daventa in siemi realitad. Ella sa realisar mintga onn in teater cun
affons e giuvenils. 2016 sepresenta quella gruppa alla Biennala a Sagogn. Il zercladur 2018
ei la gruppa da teater d’affons sepresentada al 10avel Festival da teater grischun a Tusaun.
Cun la realisaziun dil teater el liber da «La stria da Dentervals» va in ulteriur siemi en vigur
per ella.

Christina Bundi