David Flepp

Mistral Ludivic de Latour

David Flepp ei naschius 1975. El ei carschius si a Danis-Tavanasa e lavura dapi 2009 sco actur, reschissur, cabaretist e plidader independent. Denter auter interpretescha el la rolla dil «clown mét» el teater musical «Die Seiltänzerin» sut la reschia da Manfred Ferrari, la rolla dil Johannes Comander ed autras ella cumedia criminal-historica «Comander» sut la reschia da Roman Weishaupt, la rolla da Jean en il film «Kauffmann anghel» sut la reschia da Fred van der Kooij, diversas rollas el teater da moviment interactiv «Handschlag» sut la reschia da Patrizia Barbuiani e Markus Zohner.

El fa part dalla gruppa da teater per affons e famiglias «BAGAT» e gioga ell’emprema producziun «Ils bandits» ed en la secunda «Scleridas».

El ei bab spirtal, menader artisitc e reschissur dil spitachel da teater «Oh Tavanasa – ina story denter sulegl ed umbriva. In spitachel pil giubileum da 1250 onns Danis-Tavanasa.» – il fenadur 2015.

El ei confundatur e commember activ dil trio da cabaret romontsch «DaMa&co», che ha presentau la primavera 2017 siu quart program dalla sera.

Sco plidader ha el dau sia vusch denter auter per la sincronisaziun dalla retscha da films animai per affons «Il gat Miro» e dil film da kino animau «Molly Monster» da Ted Sieger.

Sia rolla:  Ludivic de Latour, mistral dalla Cadi

El meina il process encunter l’Onna (In process che vegn mo fatgs pro forma.) El agescha tenor il principi ch’igl oberkeit stoppi far sia obligaziun. En in discuors argumentescha el, daco ch’el vul  mussar negina cumpassiun e fleivlezia. Sch’ins fa quei, ein ins spert naven dalla fanestra sco politicher.

David Flepp